Íranskt trúnaðarskjal afhjúpar þá stefnu að meina bahá'íum í Íran að stunda háskólanám

NEW YORK, 27. ágúst 2007 (BWNS) — Alþjóðasamfélagi bahá'ía hefur borist afrit af trúnaðarbréfi frá ráðuneyti vísinda, rannsókna og tæknimála í Íran þar sem háskólum í Íran er fyrirskipað að víkja úr skóla öllum stúdentum ef í ljós kemur að þeir eru bahá'íar.

Bréfið afsannar nýlegar yfirlýsingar íranskra stjórnarerindreka sem segja að bahá'í stúdentar séu ekki beittir neinu misrétti — þrátt fyrir þá staðreynd að meira en helmingi bahá'í háskólastúdenta, sem voru skráðir til náms haustið 2006, var vikið úr námi og skóla á háskólaárinu 2006 –2007.

„Þetta síðasta skjal sem kveður skýrt á um að bahá'í stúdentum skuli vikið úr háskólanámi þegar í ljós kemur að þeir eru bahá'íar, sýnir svo ekki verður um villst að stjórnvöld í Íran halda til streitu þeim ásetningi sínum að meina alfarið írönskum bahá'íum að afla sér menntunar, þvert ofan í það sem þau segja við umheiminn," segir frú Bani Dugal, aðalfulltrúi Alþjóðasamfélags bahá'ía hjá Sameinuðu þjóðunum.

Bréfið afhjúpar undirferli íranskra stjórnvalda í þeirri áköfu viðleitni sinni að fá menn til að halda að þau brjóti ekki gegn þeim alþjóðlega viðurkenndu réttindum að allir fái að afla sér menntunar — og þetta gera írönsk stjórnvöld á sama tíma og þau eru að hrinda í framkvæmd leynilegum langtímaáætlunum sem miða að því að koma í veg fyrir að bahá'íar geti aflað sér háskólamenntunar.

„Þessir nýlegu atburðir ættu að vekja athygli þeirra sem láta sér annt um mannréttindi á að þeir 300.000 bahá'íar sem eru í Íran standa andspænis mikilli ógn; til viðbótar koma frásagnir af efnahagslegu og líkamlegu áreiti sem bahá'íar á öllum aldri í öllum héröðum landsins hafa orðið fyrir," segir frú Bani Dugal.

Og það er ekki einungis bahá'íum sem er vikið úr skóla, heldur einnig öðrum stúdentum sem er þá vísað úr skóla samkvæmt tilskipunum sem gerir þá að skotspæni laganna á algjörlega óásættanlegum forsendum; þar á meðal eru konur sem þurfa að þola gróf mannréttindabrot þegar óréttlátum lögum um aðskilnað er beitt gegn þeim, og önnur fórnarlömb óréttlætis í þessu landi. Þetta fólk er í þörf fyrir alþjóðlega vernd, segir frú Bani Dugal enn fremur.  http://news.bahai.org/story/575